Proverbs 31

Izitsho Zenkosi ULemuweli

1Amazwi enkosi uLemuweli, amazwi enhlakanipho awafundiswa ngunina:

2Oh, ndodana yami! Oh ndodana yethumbu lami!
Oh, ndodana yezifungo zami,
3ungadlalisi amandla akho ebafazini,
izifutho zakho kulabo abadiliza amakhosi.

4Kakusikho kwamakhosi, bakithi Lemuweli
kakusikho kwamakhosi ukunatha iwayini,
kakusikho kwababusi ukunxwanela utshwala,
5funa badakwe bakhohlwe izimiso zomthetho,
behluleke ukumisela kuhle abahluphekayo amalungelo abo.
6Phana utshwala kulabo abavele sebezifele,
iwayini kulabo abalosizi olukhulu;
7kabanathe bakhohlwe ubuyanga babo
bakhohlwe nya usizi lwabo.

8Bamele labo abehlulekayo ukuzikhulumela,
uwamele amalungelo alabo abangelalutho.
9Khuluma njalo wahlulele ngokulunga;
alwele amalungelo abayanga labaswelayo.

Amazwi okuphetha: Umfazi Oncomekayo

10Ngubani na ongathola umfazi olesimilo?
Uligugu elidlula kakhulu amatshe amahle.
11Indoda yakhe iyamthemba ngokupheleleyo
njalo kayisweli lutho oluqakathekileyo.
12Uyenzela okuhle, hatshi okubi,
empilweni yakhe yonke.
13Uyakhetha kuhle iwulu lesikusha
akweluke kuhle ngezandla ezikhutheleyo.
14Unjengemikhumbi yabathengisi,
eletha ukudla okuvela kude.
15Uvuka ekuseni kusesemnyama;
alungisele abomuzi wakhe ukudla
abele lezincekukazi zakhe.
16Uyayihlolisisa insimu mandulo kokuyithenga;
ngalokho akuzuzayo uyahlanyela isivini sakhe.
17Uwubamba ngokukhuthala umsebenzi wakhe;
aqinise izingalo zakhe emsebenzini.
18Uyananzelela ukuthi ukuthengisa kwakhe kulenzuzo,
lokuthi isibane sakhe kasicimi ebusuku.
19Uphatha uluthi lokuphotha ngesandla sakhe
abesebamba ngeminwe yakhe isigudugudu sokweluka.
20Welulela izandla zakhe kubayanga
njalo ulezandla ezilula kwabaswelayo.
21Lapho kukhithika ungqwaqwane, kalakwesaba ngabendlu yakhe;
ngoba bonke bagqoke ezibomvu.
22Wendlala amalembu ombheda wakhe;
agqoke ilineni elihle lezigqoko eziyibubende.
23Indoda yakhe iyahlonitshwa enkundleni
lapho efika ihlale khona ndawonye labadala belizwe.
24Uthunga izigqoko zelineni azithengise,
abathengi bemigaxo bayizuza kuye.
25Wembethe amandla lesithunzi;
uyahleka loba kusiza insuku ezimbi.
26Ukhuluma ngenhlakanipho,
lezeluleko eziqondileyo zisolimini lwakhe.
27Unqinekela ezomuzi wakhe
njalo kadli isinkwa sobuvila.
28Abantwabakhe bayambonga bathi ubusisiwe;
lendoda yakhe layo iyamdumisa ithi,
29“Banengi abafazi abenza izimangaliso zobuhle,
kodwa wena uyabedlula bonke.”
30Ukubukeka kuyakhohlisa, lobuhle buyaphela;
kodwa umfazi owesaba uThixo kadunyiswe.
31Kaphiwe umvuzo wobuhle abenzayo,
imisebenzi yakhe imlethele udumo enkundleni.